galizart

« Granell e as mulleres | Weblog | Mónica Vila »

Realidades líquidas

É a segunda ocasión na que expoñen de maneira conxunta, e da man de Moret Art, en Galicia. O proxecto plástico que presentan ten como fío condutor a auga e está composto por máis dunha vintena de obras que sobordan habilidade técnica e sensibilidade. “Foi moi enriquecedor ver como se xestou o proxecto. Traballaron en equipo desde o momento cero, primeiro para atopar un concepto común no que a linguaxe de ambos puidese funcionar de maneira conxunta, e posteriormente para que se establecese un diálogo entre as obras de cada un. O traballo foi moi intenso e se estendeu máis dun ano e medio pero o resultado é excepcional – manifesta Nuria Blanco, directora da sala coruñesa”.

María Treviño achégase ao mundo acuático, ou máis ben poderiamos dicir “subacuático”, a través do retrato, dándolle un aire persoal e contemporáneo a este xénero, cuns nenos como protagonistas que espertan unha emocionante tenrura. Nas obras de Juan Gallego o actor principal é o mar, embravecido en expresivas ondadas ou en calma baixo a superficie, creando un xogo entre figuración e abstracción, así como entre o vivo e o inerte.

Ambos artistas (Juan Gallego, 1972 / María Treviño 1975) contan cunha sólida traxectoria e expuxeron nas mellores salas de exposición tanto a nivel nacional como internacional, así como en destacadas feiras de arte contemporánea como ARCO ou KIAF en Corea. Juan Gallego foi premiado en numerosas ocasións por importantes entidades como Caja Madrid ou BMW, e exerce como profesor na facultade de Belas Artes de Madrid. Pola súa banda, María Treviño, ten unha dilatada traxectoria avalada pola súa participación en destacadas feiras así como pola súa presenza en reputadas coleccións privadas a nivel nacional.